(1908) Ca'un no suyo

link

Yera un d'esos dis de sol que aplanen al mundu. Montes y praos fierven de calor que tal paez que l'aldea y'un magüestu.
Yeren los diez en filu. En un prau que desaparta una múria vieya d'un camin que se retuerce por entre vegues y matos, segaba Pinon; un vieyu juerte y llucíu; colorau y mantecosu.
Al ris ras de la gadaña, acompañaba un cantar quedu y tembleque. ¡Canta y trabaya Pinon, mianiques non echa xera en balde!
Pinon llevanta 'l cuerpu fai tiempu ya doblau so la tierra; arresopla pa tomar fuelgu; cúspe nes manes pa siguir co la siega, cuando n'esto mira pa'l camin y quédase en tientes.
Pe la caleya alante patuca otru paisanu. A cien llegües conozse que vien de la villa: bien lo diz el paxiellu domingueru, les borceguies untaes con tocin y un envoltoriu de papeles que apertaba baxo'l brazu.
Al ver á Pinon párase; y cincando una pata so la múria entamen entrambos á dos á falar.
-Güenos dies Pinon.
-¡Ma!; güenos los tengas, Xustu.
-Trabayando ¿eh?
-Ello soi o, mal diañu si se fai. Y tu, ¿de la villa?
-D'allá vengo.
-¿Ta andes en pleitu?
-Non home non. ¿Porque lo dices?
-Como traes al retortoriu esos papeles...
-El que ¿ésto? Ye solfa pa'l cura.
-¡Solfa! ¡solfa! ¿Y que ye eso?
-Non seyas burru, Pinón. Tocates escrites en papel pa cantales el cura en misa.
-Cualo ¿eso que cuando canten talmente paez que barren fuera el alma?
¡Bah! Y que dicen que ye llatin ó italian? güeno, güeno.
-Calla Pinón, que dicen que val mucho, si, home si. Diéronme apuntáos en'un papel unos nomes muy enrebesaos y que valen non se cuanto.
-Dexate de bobaes. Onde ta una Osaviana bien cantá, que val tóo eso en italian mixtu de nuvieya y gochu que nin el degorio lo entiende.
-Que tales Pinon, tas llocu.
-Llocu taráslo tu, barájeles. Que recóndio andes ahí en relicarios de cantates y bobaes. El Santa Maria, Carretera á baxo va, La Soberana esos, esos cantares que dexa tochu el italian y llatin. Tóo lo demás son aveyones que gufien. Barájoles co'l utru..!
-Non t'engrifes Pinon.
-¿Non tó engrifame?, ¡Recondio!
-Y n'estos tiempos ¿quien canta ya tóo eso que fales?
-¡Que quien lo canta! ¿Quies oyilo agora?
-¿Vas cantar tu?
-Non piesque non tengo humor, pero el gargüelo ya non me dexa. De tóos móos móos, no faltará quién lo faga. ¡Pinin! ¡Pinin!
-¿A quien llames, on?
-Al mio nietu, sandiez. ¡Pinin, Pinin!
-¡Mande!-Oise gritar á la parte de allá de prao.
Y un rapazucu cuerri á gálamos pa xuntu ellos.
-A ver, barájoles - diz Pinon - canta ahí el Santa Maria pa que t'oiga Xusto.
-¿Agora güelu?
-¡Agora, recondio, agora! Canta que dó te yo'l son co la gadaña.
Y la voz de Pinin recia y juerte alborozando la quintana, canta con son dulce y melgueru.
"Santa Maria
en el cielo hay una estrella
que á los marineros guía."
Pinon caiai la baba y rascábase de gusto oyendo'l nietu.
-¿Ves ahí, Xusto? ¿Cántase, ó non se canta? Y esto ansí solo, que si al par de'l, sona la gaita, adios italianes y llatines. Y non me vengas más con tales relicarios, porque súbesme la flema recondio, y non se que fago.
Xusto estrúma los papeles entre les manes, y écha caleya abaxo murmurando per lo suave:
-¡Tien razón el reflán! "Cad'un no suyo"
Pinon cúspe nes manes, ráscales na culera y torna á segar cantando baxo muy baxo Santa Maria...